Os documentos máis antigos non falan da Virxe dos Ollos Grandes, senón simplemente de Santa María de Lugo, a titular da Catedral desde hai case nove séculos.

A advocación da Asunción permaneceu inalterada como dedicación do templo, mentres que o nome de Virxe dos Ollos Grandes foi xurdindo pouco a pouco na devoción popular.

Non coñecemos o momento exacto en que alguén pronunciou por primeira vez ese nome. Tampouco existiu un decreto que o establecese.

As palabras coas que un pobo expresa a súa experiencia de fe nacen, moitas veces, dunha imaxe capaz de espertar proximidade e tenrura.

Non deixa de chamar a atención que, entre todos os trazos da imaxe, fose precisamente a mirada a que acabara dando nome á Patroa de Lugo.

Co paso do tempo, Lugo acabou coñecéndoa como a Virxe dos Ollos Grandes.