Cando contemplamos unha obra deteriorada, pode parecer que restaurala consiste simplemente en limpala e reparar aquilo que está danado.
Pero restaurar non significa refacer. Como explica a directora técnica do Centro de Conservación e Restauración San Martín, Vania López, antes de intervir é necesario coñecer a obra, estudar os seus materiais e comprender as transformacións que experimentou ao longo do tempo.
Só entón se pode decidir que necesita realmente e ata onde se debe actuar.
O proceso comeza polo máis elemental: retirar coidadosamente o po e a sucidade superficial. Se existen zonas de policromía desprendida, fíxanse antes de continuar para evitar calquera perda. Despois chegan as probas e os tratamentos de limpeza, sempre adaptados a cada material e ao seu estado de conservación.
Criterios de restauración
E hai un principio fundamental.
Cando falta policromía, a intervención limítase ás lagoas existentes, de maneira que se poida recuperar a lectura do conxunto sen ocultar nin substituír aquilo que chegou ata nós.
Ese mesmo criterio guía toda a restauración da capela: intervir só onde sexa necesario, empregar materiais compatibles e respectar as pegadas que forman parte da súa historia.
